今年E3 2017又完結，土下座就覺得今年有少少悶，除咗因為上次提過嘅「黃牌」公眾人士太多影響展覽風格外，客觀咁講，亮點都真係唔多，特別係PlayStation罕有咁「冇貨賣」，成個記者會只係不斷播game片，冇嘉賓冇戰略宏觀亦冇數據分享，淨講記者會就明顯Xbox高好多，新機Xbox One X不論成功與否亦有一定話題性。若然再退後一步睇，認真講似乎Ubisoft先係今年最大贏家，部分外媒似乎亦同土下座有相同睇法。原因算幾明顯，首先《Assassin's Creed Origins》久別2年重臨，仲以「起源」為題，真4K畫面全面對應Xbox One X，順利連同新機成為記者會上焦點之一。另一方面，又同任天堂合作推《Mario + Rabbids Kingdom Battle》，任天堂近期氣勢有幾勁就唔重複，令兩大主機公司都見Ubisoft身影，加上都並非「白頭片」，已經決定今年內會推出，要知道PlayStation所有重點遊戲都係2018預定，大作係勁，但現場幾乎都只係得睇片冇試玩，淨係呢點，Ubisoft好難唔大勝！