中國玻璃配股予中建材。圖為其年報。
中國玻璃(3300，下稱中玻)除咗已有兩位大孖沙，啱引資中國建材，博中玻谷底翻身，又博俾大股東湊大，起碼睇翻半番。
中玻大股東聯想控股，揸咗中玻26.6%，另一間日本Nippon Sheet Glass(日：5202)，揸25.17%，市值66億港銀，係集團16億銀市值嘅4倍。中玻呢兩位大股東，已經係大孖沙級數，又新鮮熱辣，中玻啱公布，以無折讓、周三收市價0.94元，配2.6億股俾建材界巨無霸中建材，呢批貨佔中玻已擴大股本14.36%。
中玻股東人強馬壯，唸到係，無論揩到聯想熱爆科技項目，或者食住新股東中建材行內地位，中玻都掂過碌蔗。
又中玻2012年度勁出血1.7億銀人仔，股價沉底見2013年7月0.76元，中玻現價(1.04元)唔差太遠。睇番行頭，工信部8月落order，要求嚴格遏制玻璃新增產能，而據摩根大通9月發嘅報告，話同玻璃業行家交流後，得出結論，就係祖國浮法玻璃最壞嘅時刻已經過去，兼且係最佳入貨時機。
而呢段期間，阿爺持續放寬內房限購令，呢一點，對包括好似玻璃、水泥同鋼鐵行業，係一支中期強心針。
專業評估，中玻今年每股純利8.75港仙，預測市盈率得11.8倍，上邊日本股東Nippon Sheet Glass講緊59倍，博中玻翻身，當翻半番到1.56元咁計，預測PE先得17.7倍，未有耐追到日本股東。
作者為中細價股專家