西沙新盤與樓市幻覺
近日西沙新盤開賣，呎價夠平，加上發展商提供兩次「一Q清」付款計劃，不少人入場。有記者訪問我：「咁多投資者買樓，係咪代表樓市有希望？」我聽完有點錯愕，彷彿大家活在平行時空。
因為我認識的真正「投資者」，包括身家過百億的，無一個看好後市。有人慶幸幾年前夠保守，否則今日下場就跟某某一樣。身家幾十億的，日日諗緊怎樣減磅、怎樣高價賣貨，不要蝕得太肉赤。超過一半人已經深居簡出，忙著同銀行傾方案。今次跌市，輕則蒸發一半身家，重則幾乎沒頂。
這班人現時一星期收到幾個「低估價」筍盤，6厘回報以上，但一點也不心動，因為他們看不到任何利好訊號。而早幾年博盡買貨那些，現在不止清倉投資物業，連自住豪宅都在放售。
至於新聞上見到的大額成交，多數是中資財團或個人，他們在香港買樓有其他考慮，但也要求至少6厘回報。至於西沙那全部600萬元以下的小型單位，買家多屬初哥，「投資市場」對這一類人早有定義——叫「魚」。
正如金融海嘯時，恒生指數由3萬點跌到2萬點，很多人以為撿到平貨，怎料1萬點才是底，再要輸一半。今次樓市既是「形變」亦「勢變」，就算見底，都未必會回升。