Ad Block Ad Block
財經
2021-07-21 15:12:00

成熟投資者喜歡打書釘

分享:

有老友問我有冇去書展,我話新冠肺炎疫情下,雖然已經打了兩針,但咁多人地方,可免則免。而且去書展都唔會買書,最多打下書釘,如果要打書釘,不如在屋企打,因為仲有很多書仍然未睇。

老友話不明白,點解我肯定唔會買書。我話不同年紀的人對於書籍有不同詮釋。少年好買書,買了之後三幾日就會掉走。青壯好藏書,買了之後唔會讀,但又唔會掉走,會放埋一邊,等到老婆鬧才會大手清理。年長者好讀書,即是打書釘,很少會買書。老友話唔知有這個情況,唔知真定假。

老友可能唔知道不同年紀投資者對於投資物業亦有不同詮釋。年輕投資者鍾意買買賣賣,摸出摸入,就算買到一件優質貨都唔會長揸,賺多少錢就會賣走,跟著大宴親朋,物業代理最愛。

中年的投資者發覺當年買入的物業,如可不賣走,今日升幅驚人,於是只買不賣,甚麼逢三退一都是廢話,恐怕捉到鹿唔識脫角,最後揸到成手貨,當遇上風吹草動,如果財力不足,手上的貨就會被銀行大手清理。

年紀比較大的投資者不時去睇樓盤,但很少還價,所以,物業代理最不喜歡年紀比較大的投資者,話他們只睇不買,只不過是打書釘。

作者為紀惠集團行政總裁

文章轉載自「AM地產」facebook:
http://bit.ly/2wls4EF

請接受以下私隱政策及免責聲明,以示你同意am730內之私隱政策及免責聲明。了解更多
接受