我經常都被老友話做生意不夠進取，又唔識得借錢，就算有錢賺，都唔可以賺盡，應該向那些識得借錢生意人學習，我話自己天資愚鈍，有這樣的成績已經唔錯。近日有不少豪宅業主因未能依期還錢，他們所按的自住豪宅被銀主沒收，變成俗稱所謂的銀主盤，老友見到我就話好彩我蠢，唔識得借錢，否則就算失慘重。老實說，我唔知道老友的說話是褒抑或貶，既然唔知，當佢讚我。
全香港人都知道樓宇長揸必升，所以，一般業主未到最後關頭都唔會賣走手上物業，尤其是自住單位，但長揸背後有一個基本要求，就是借貸比率不能太高，否則遇上樓價下跌，或者自己沒有能力供樓，擁有物業就會被銀主沒收，所以，太叻借錢亦未必是好事，因為即是將借貸比率維持在高水平，總有一日樓價會出現一個比較顯著跌幅度幅度，那些太叻借錢的人就會受到傷害。
由於金管局以逆周期措施，將樓宇按揭收得很緊，如果不是樓價大跌，銀主盤根本不會出現，但有些人利用漏洞，將物業向財務公司借錢，結果當然可以借得比銀行多很多，但借了的錢不但要還，還要俾高過正常幾倍的利息，在樓市順風順水，每年有7%至8%升幅，或者可以捱得住，倘若樓市形勢逆轉，那些向財務公司借錢的業主，他們所按的物業隨時會變成銀主盤，大家雖然知道樓市長遠必升，但原來欠債多與少才真正決定輸贏。
作者為紀惠集團行政總裁
文章轉載自「AM地產」facebook:
http://bit.ly/2wls4EF