威華達聞到飯香

上個月10號，他報主打威華達(622)喺呢轉跌市，集團仲守喺第二日(11號)嘅上升裂口之上，硬淨到爆。而噚日個市回暖，威華達配合大成交即彈，聞到飯香。

一講威華達，唔可以唔提集團大股東歐亞平。上年尾報載，歐生坐正成電貿大孖沙雙馬合組「眾安保險」嘅掌舵。呢期新聞，眾安保險開始出擊有搞作。講咁多嘢，似乎同威華達風馬牛不相及。但諗深層，威華達再無其他主業，依家主打嘅金融證券業，唔係話大龍鳳，但同上邊眾安保險，業務上就有少少近磅。威華達呢個近水樓台嘅link up，就好有遐想。

威華達淨現金高達16.6億銀，連揸住港華燃氣(1083)證券投資，等值淨現金高達18.5億銀，或每股0.26元，威華達現價(0.207元)仲係潛緊水。

好正常諗，威華達壯大業務，集團咁多銀彈，無問題。又假設咁講，威華達將絕大部分現金派出街，除息後，市值縮到得番1億幾千萬，然後再賣殼，相信亦大把人爭住要。

場內近磅例子，福源集團(1682)由上年7月醞釀賣盤，到落實出售，噚日復牌，累計大升1.8倍，兼計劃大派特別股息。買威華達，上番每股淨現金，講緊要升25%，中線少少，博其中一瓣可能落實，博威華達放紙鳶，係睇佢倍升到每股資產淨值約0.55元。

作者為中細價股專家