有些上市公司現金比市值高。(資料圖片)
前幾日閱到方卓如先生寫中金(3908)寫的老千股報告，他認為作者是「典型考完CFA以為自己好醒，做一輪枱頭資料搜集，撳幾下電腦，就當係做咗功課。佢哋係唔知道佢哋寫嘅冧巴背後有甚麼故事。」未生特意來為中金平反。
中金雖然他們在報告有講「並無法充分把握所有老千股，很可能有遺漏、也有誤選」，但未生認為，報告的蛛絲馬跡可以找到更多老千股。就算這位方先生說，「老千股入面，肯定有冤案」，但「有殺錯，無放過」最少得保平安。
方先生又說，「部分已經賣咗，等下手發揚光大；有啲正在求售，而家處於殼價都未到嘅低位。賣咗嘅老千股，股價仲比出售前有近3倍升幅，前後未夠半年。」，未生舉中金報告提及威利國際(273，現名民信金控)作例子，前一陣子似乎轉手了，但然後又用新的概念，又學以前老細咁供股，轉手同唔轉手有無分別呢？
剩下的求售，究竟老千的朋友是否好嘢或是假借轉手之名炒股，無人知，大家都是估估吓，就算股價升咗你敢唔敢買，就算證監會話到明要打壓供股、開始打擊注入估值過高的資產，咁又點，他們咪又是照樣賤價大比例供股，照樣買幾十億元資產，瘋狂印股票，攤薄股東，變相賣殼，小股東有甚麼得益？另外，公司股價升咗無人敢買賣，始終會爆煲，故唔好怪未生「淋紅油」，但真是「臭罌出臭草」。
未生作為書卷派，研究股票多年，有一個未考完的CFA，但肯定就算知道大半個故仔點做，你都是會輸硬，我有個朋友就是咁輸晒成副身家，人哋食你夾棍是唔使講時間的，你可以話他抵死，但有人會高估自己能力。
方先生說有些公司「一大堆市值仲低過資產淨值嘅公司，有啲仲係現金多過市值。」，未生都知道，但大部分是位於紫砂壺原產地、有些是位於東南某省，又或者已經中金在老千股名單上。如果方先生是一個聰明的老闆，我問問你會唔會公司資產值20億元，手上有10億元淨現金，然後用5億元的市值集資，如果方先生話到俾我聽「Yes」，這班人非常正常的話，仲話自己知道「邊幾間連大老細都持貨不多」，咁點解自己還在報紙寫話人唔識現實世界，不如做埋股壇狙擊手接班人？
未生雖然知現實世界太多老千，欺人太甚，買老千股反而可以帶挈你賺幾倍，買實業股隨時死人，未生已多次受害，但時間可以證明一切，不是老千又真是超值的股，價值一定會反映。