兵工廠唔怕冇高中鋒

阿仙奴20年前不敗封王神話嘅主角之一、瑞典球星龍格保早前喺一個英超節目中，大談當年那支無敵之師唯一缺點係冇高大中鋒。時移勢易，高空波唔合潮流，強如1米94嘅當紅「藍月」中鋒艾寧夏蘭特，暫時入嘅50個英超入球(36+今屆14)，只有10個係頭槌，最勁係隻食胡左腳。兵工廠今屆爭霸嘅弱點，唔係冇高大中鋒，最重要係主帥達Sir肯多輪換，俾主力回氣，以比上屆更優秀嘅守力，20年後嘅今屆，用不同嘅演繹，再創封王神話。

奇怪曼城今屆控制唔住場上嘅比賽節奏，頻頻跟列強駁火，始終歷來守力最強球隊，先係爭霸嘅最大籌碼。藍月暫時平均每場失球1.14球，兵工廠係0.78球；阿仙奴今屆鬥弱隊冇乜霸氣，但每能控制比賽節奏，令傷兵不多。上屆兵工廠攞住最多8分優勢，照失英超嘅主因，係中堅之一威廉沙列巴背傷提早兩個月收咧；如今加埋嗰粒價值連城嘅「防中飯」，成為佢哋今屆爭霸最強嘅中後場鐵三角，踢法比上屆穩陣，而最強對手藍月又要掛住嚟緊去中東踢世冠盃，小兵只要健康，年尾有機會再放甩啲，又睇吓藍月今屆點追？