榨乾阿積士
近代歐洲最成功嘅selling club荷甲阿積士，自從主帥「坦克」兼隊內「前後主將」安東尼馬菲奧斯及利辛度馬天尼斯，先後被曼聯撬走，幫阿積士去年夏天埋單總計勁收超過2億歐元轉會費後，挖到咁深，終要見底。歐聯分組賽出局後，轉戰歐霸即死，替補孭重飛新兵好似「3B」前鋒波比、貝雲積同守將巴斯唔多夠班。年初由荷乙阿積士青年隊提升名宿希汀加，頂上主帥一職，神仙難變；最終近期輸完荷盃俾死敵燕豪芬後，聯賽接連失分，難望再以前兩名身份，連續14屆參戰歐聯，來屆要淪落踢歐協聯外圍賽。阿積士暫比篤定封王嘅飛燕諾少13分，差距罕見咁大；靚貨榨乾榨淨，下屆收入預期大減，只怕沉下去。阿積士崩盤，荷甲更失色。飛燕諾主力陣容大部分係非荷蘭球員，首席神射手係來自墨超嘅新人辛迪亞高基文尼斯；而現時射手榜頭兩名係踢緊烏德勒支嘅希臘人杜維卡斯同海倫芬嘅名將之後雲賀奧當。傳統三強得返一個燕豪芬嘅荷蘭新星中場沙維施蒙斯，歐洲大會當然唔會留手，繼續全力掏空荷甲！
