英超中游唔怕拆骨
英超嘅購買力，今夏繼續傲視歐洲，暫時十大重磅轉會，英超入貨佔9宗；只係皇馬簽入般茅嘅中堅甸侯辛，為西甲佔一席，最貴係利物浦嘅德國新星科利安華迪斯，但睇下紐卡素會唔會肯放走伊沙克做今夏新標王。多宗頂級交易都係由紅軍帶動，計埋快手簽入法國新星中鋒伊基迪基，佢哋淨支出超過2億英鎊，會唔會係預咗放走路易斯迪亞斯或者達雲紐尼斯，幫補使費，繼續炒熱歐洲轉會市場？
今夏較特別係英超中上游球會被列強輪流拆骨，冇乜抵抗能力，由上屆排第7起嘅森林、白禮頓、般尼茅夫同賓福特，再數到下游嘅韋斯咸同狼隊，都收到靚價放售主將。當中除咗來季代水晶宮升級戰歐霸嘅森林，透過新高層伊度喺祖家巴西，撬走保地花高前後兩位好手較有野心外，其餘球隊攞住大筆轉會費，暫時睇定啲先，以財務健康為首要任務。外界最擔心係大變嘅賓福特同財政唔理想嘅狼隊，來屆下游掙扎；但只要「英冠升班三寶」繼續唔夠班，英超中下游安於現狀，又點會怕被挖角。