今屆歐國盃睇咗咁多場，暫時覺得最緊張都係德國對意大利嗰場。雖然意大利飲恨，但發揮得出色係有目共睹嘅，特別係防守方面，除咗有鋼門保方屢救險球之外，仲有費奧倫斯嘅精彩救空門。好波不妨一睇再睇，睇番慢鏡至清楚見到佢當時飛身用虎尾腳撐走個波，難度系數達9.999分，防守意識同身體意識真係配合得天衣無縫，真係型到O晒咀。德國嗰邊已經變陣，由4-2-3-1改為3-4-3，由曉姆斯、謝路美保定及賀維迪斯踢三中堅，但依然有漏洞，俾意大利製造咗幾次埋門。德國成功晉級，令路維破紀錄成為首位能連續5個大賽都殺入4強嘅主帥，但曉姆斯下場停賽，加上有傷兵，4強將遇上更大考驗。
