能夠踢頂級聯賽兼效力大牌球會之外，最好當然係贏盡冠軍殊榮。好似兵工廠咁，一路持續冇盃落袋，就可能觸發起球員四散嘅局面。
足足6年，真係望穿秋水，兵工廠球星唯有各有各閃，唔止賓特拿同丹尼遜今夏會走人，連法比加斯雖然要成4,500萬英鎊巨額轉會費，但係似乎都同巴塞好事近。至於法國球星拿斯尼就有傳將會「入魔」，事緣佢想加人工，但係要加到同法比仔一樣嘅11萬鎊周薪，先至肯同球會續約。不過，唔知佢係咪恃住自己今季發揮得好，又有同曼聯斟介嘅傳聞，所以更加有牙力傾續約條件。之不過，3年前阿仙奴都只係用咗1,200萬鎊從馬賽買入佢，一旦傾唔掂數，即使賣走佢都有賺。
兵工廠留得住班球星固然係好事，不過引入強援，都係另一個好辦法。