今晚英超上演兩場賽事，其中韋根主場對史雲斯較具競爭性。「根哥」近期為咗護級而使出渾身解數，繼主場以2比2賽和熱刺後，上仗作客喺兩度落後下，以3比2反勝西布朗，取得寶貴3分，目前以35分排尾三，餘下3輪賽事，必須積極搶分，否則下季英冠再見。佢哋今季主場成績一般，至今只係贏過4場，勝出率得24%，略欠主場威力。史雲斯近況未如理想，聯賽連續7場未發市，取得3和4負劣績，現時處於中游位置，已無欲無求，餘下賽事鬥志成疑。論鬥志、近態及實力，根哥絕不輸蝕，加上有護級壓力，球員一定搏到盡去贏波，預料可小勝對手。
