重開下嘅足球，最唔慣嘅係冇咗現場氣氛，所以各隊都別出心栽，用紙牌人甚至吹氣公仔，又或者喺現場、電視畫面配球迷打氣聲，盡力搞氣氛。不過明晚上演德甲國家打吡，多蒙特迎戰榜首拜仁慕尼黑，坐到8萬2千人嘅主隊球場，勢必空蕩蕩；冇咗一幅南看台、以往可容納2萬5千名球迷嘅著名「黃牆」威力，多蒙特擋唔擋得住拜仁以強大鋒力爭8連霸，亦關乎德甲往後一個月嘅注目度。呢場對亞洲球迷嚟講咁正嘅「臨瞓甜品」，點可以錯過。許勝不許敗嘅多蒙特今仗只能閉門迎強敵，梗冇著數。重開後嘅德甲打咗兩周，主隊勝率大跌，首周9場只得1支主隊勝出，正是多蒙特；次周得拜仁同哈化柏林開出主勝，可見疫情下主場威力大減。
西甲已定重開日期，英超又蠢蠢欲動，如果今場拜仁贏埋，德甲季尾更似踢練習賽，球迷視線會快速轉向英、西。歐洲超新星艾寧夏蘭特，可唔可以領「蜜蜂兵團」扭轉形勢，得以對住「空牆」祝捷，會係往後身價嘅重要啟示。