「我要感激我嘅球迷、太太同埋女朋友。」効力南非自由邦星隊嘅加納22歲前鋒阿拿斯,就係咁樣一句成名。阿拿斯喺一場比賽梅開二度而獲選Man of the match,賽後接受訪問時,一時口快同時多謝太太同女朋友,不過喺電光火石之間就意識到唔對路,即刻兜返話意思係指老婆,仲同老婆講對唔住同埋真係好愛佢。呢啲係解釋定掩飾呢?
由於條片瘋傳令佢突然爆紅,好多花生友想八卦真相,阿拿斯於是再回應話真係好愛太太,多謝佢生咗兩個小朋友,同埋會叫個女做女朋友,真係冇一腳踏兩船。咁佢太太真係可以放心,因為阿拿斯爆紅之後,肯定有大把人𥄫實佢有冇曳曳。