皇馬喺打吡戰失分，以為巴塞機會嚟喇，可以攞3分上榜首(雖然踢多一場)，但竟然作客護級球隊馬拉加淨吞兩隻光蛋，尼馬仲要被逐離場。上半場球證見到尼馬綁鞋帶，就話佢揼波鐘，阻礙馬拉加開罰球而食咗面黃牌。當時只係0比0，又唔係去到比賽尾段，咁都要罰黃牌，點解嘅？
到64分鐘，尼馬一次追波落到底線附近，可能個人躁躁哋而飛踢對方嘅迪亞高洛蘭迪，再嚟多張黃牌變紅。入球員通道時，佢又疑似拍掌寸第四球證，隨時有手尾跟，分分鐘冇份踢作客皇馬嘅國家打吡，真係一念天堂，一念地獄！馬拉加取得護級救命3分，巴塞就繼續排第二，落後少踢一場嘅皇馬3分。