輸互射12碼，對於老牌三獅迷，唔會陌生；喜見今屆歐洲國家盃喺疫情陰霾下，振奮人心，比賽形勢接近，可觀性極強，印象會深。真心佩服意大利一對合共年逾70嘅老中堅，拚盡終為藍軍再登歐洲之巔；又喜見球王美斯，在另一大洲為阿根廷征戰16載到34歲，在國際大賽封王。強大嘅英超始終係三獅主帥修夫基未來平反嘅最強後盾，下屆世盃決賽周尚餘16個月，足球不回家，但球隊亮點多，三獅旅程或者喺下年西亞嘅卡塔爾走得更愉快。
修夫基決賽部署孭鑊，但始終份CV由18年世盃殿軍升級至歐國盃亞軍，帥位仍穩。佢以往嘅保守令球隊不失球，贏盡掌聲，反成今場決賽嘅一大負累；但不到個半月後又要領軍續戰世盃外圍賽，同組對手最強僅波蘭、匈牙利之流；仲有魚腩聖馬力諾同安道爾，必放膽俾新星祖迪比寧咸、下季踢曼聯嘅查頓辛祖同最令人期待嘅菲爾科頓出場，調整進攻陣式。只要門將比克福特繼續咁fit，哈利卡尼今夏過檔大會更上層樓，三獅痛楚，不日痊愈。