3月英超，時雨時雪，酋長球場上演雙紅會時，好似倒水咁。以前見到喺咁惡劣嘅天氣下比賽，廠迷總會閉翳，因為以往由雲爺爺帶領嘅「少爺兵」不擅劣境下硬碰，但阿仙奴新帥艾馬利上任後，球員質素正如英超名宿評述員加歷查所講，一樣係第六名貨色，但艾帥明顯改變隊內錫身文化，睇季尾走勢，阿仙奴入到三甲都唔意外。艾馬利擺明喜用小將，難得再見到中場兩位大佬艾朗藍斯同奧斯爾鬥曼聯時喺風雨中同時正選，機會再冇幾多次。一對翼衛都明顯有病有傷，哥拉辛拿斯踢到場中嘔吐大作都撐足全場，大振士氣；呢架「波斯尼亞坦克車」有啲進步，進攻尤其可以多用。
早一個禮拜，奧巴美揚12碼宴客已放生熱刺一次，今場有啲運氣下贏到曼聯對爭前四好關鍵，睇到阿仙奴喺季尾聯賽嘅作戰心態，明顯有勢。以阿仙奴現時嘅球員質素，要成功兼顧兩線有啲吃力，即將又要面對不可能的歐霸盃任務，出名係呢個盃仔嘅捧盃專家艾馬利，到時排乜陣，多少會反映球會嘅短線未來看法。