拖連奴啱啱喺意大利盃16強作客以1比2不敵AC米蘭黯然出局，今仗聯賽返回主場能否報回一敗之仇？佢哋今季主場表現相當不俗，取得6勝2和1負成績，仲曾擊敗二哥羅馬，而唯一敗仗係同市宿敵祖雲達斯，勝出率有67%，平均每場入2.3球只失1.1球。但中場耶高法爾基腳踝受傷缺陣，另一加納中場艾古亞出戰非國盃，加上後衛巴列卡停賽，未能強陣出擊。AC米蘭今季表現明顯較去季好，由於中資集團最快要3月先可達成收購交易，1月轉會窗未必有資金買人，繼續原陣應戰。佢哋今季作客成績一般，至今只曾4勝，贏嘅全屬中下游球隊，略欠說服力。除原有傷兵外，新晉後衛阿利斯奧羅馬洛尼患重感冒，上陣機會不大。對賽方面，近6次到訪拖連奴，雖然錄得2勝4和不敗，明顯佔優，但拖連奴主場實力不容輕視，預料今仗可坐和望贏。