今晚上演洲際國家盃B組分組賽，由澳洲對德國。澳洲剛喺友賽以0比4不敵巴西，但喺較早前嘅世盃外圍賽，佢哋就主場3比2力挫沙特阿拉伯，目前喺亞洲12強B組暫列第三，同次位嘅沙特同得16分而僅落後榜首嘅日本1分，仍有機會直接出線俄羅斯決賽周。澳洲今次大軍名單唔差，仍有老將卡希爾、哈化柏林前鋒馬菲歷基、國際米蘭後衛沙尼貝利及史特加門將蘭格歷克等等，都有一定戰鬥力。德國教頭路維今次徵召唔少新人，缺少一班主力，整體實力大打折扣，但陣中仍有不少具潛質球星，包括RB萊比錫前鋒添姆雲拿、曼城翼鋒辛尼及拜仁後衛甘美治等，只要演出對辦，仍有力擊敗澳洲先拔頭籌。