其實摩連奴都幾慘，一帶住曼聯對舊東家車路士，就會被「藍戰士」球迷鬧佢係反骨仔，上次足總盃作客車仔，佢就向車迷舉起3隻手指，示意「仲記唔記得我曾帶領車仔贏過3次聯賽冠軍呀」，但仍然被視為叛徒。咁摩帥都好清楚依家邊個先係老闆，紅魔主場以2比0擊敗車仔之後，佢離場時用手指篤住心口個曼聯logo，唔知係慶祝定示威動作，但都係爭氣贏波最緊要。曼聯今場袋走3分，已經英超22場不敗，少踢一場下落後第四位嘅曼城4分，仲有機爭前四。相反，車仔今場作客表現不濟，全場攻門零中目標。有人話今場球證執法太寬鬆，曼聯嘅犯規多數口頭警告了事，但勝負關鍵始終都係摩帥精心部署嘅戰術，成功咁凍結夏薩特同柏度，防守穩健之餘，亦配合靈活走位造就進攻。