雙紅會中保羅普巴犯手球成為罪人，搞到被利記先入1個12碼。好彩伊巴謙莫域臨尾做救世主幫曼聯追和，賽後伊巴好唔好老脾咁話球隊喺上半場犯下低級錯誤，搞到俾對手瘋狂壓逼。佢咁口響唔止係因為做咗功臣，其實佢啱啱至病好，不過完全冇跌watt，35歲嚟講真係恢復得算快。自從佢轉投紅魔後，已經攻入19球，英超就有14球，仲同迪亞高哥斯達同阿歷士山齊士並列射手榜首位。講番普巴，背負全球最高轉會費身價，咁啱同日仲發布佢個emoji，大家都對佢好高期望，但出事前佢已經3次走甩洛夫雲，教練應該提佢小心，結果跳起時間錯咗變手球，其實責任唔止佢一個嘅！