兩年前嘅夏天，曼聯備戰新季，被安排遊走3大洲包括去澳洲、新加坡、上海同奧斯陸；一眾球星包括保羅普巴、連迪路夫及安東尼馬迪爾壓陣，據報戲金加埋售買商品，大賺逾1,200萬鎊，最後返到卡迪夫互射12碼贏AC米蘭，季前6戰6勝，贏盡掌聲，但之後聯賽開季出閘脫腳；頭6場到9月錄得勝和負各2，球員身心勞累有因，而當季最後被封王嘅利物浦拋離33分，排第3。
如今新冠病毒疫情陰霾不散，列強失出埠賺大錢機會。英超列強同法國豪門PSG仲頂得住，唔會冇得做騷就勒緊褲頭，夏天繼續重金增兵。曼聯今夏5戰全喺英國進行，拍跳對手係打比郡、昆士柏流浪、賓福特、普雷斯頓同愛華頓；而粗略看過只有7支英超隊計劃去外地踢表演賽，最遠係阿仙奴同愛華頓去緊美國參加四角賽。叫座力極強嘅曼城，都只係7月底去法國特魯瓦撐呢間姊妹球會場；各列強主力經歐國盃或美洲國家盃後，歸隊唔使再舟車勞頓，今屆嘅季初病未必出現，近兩季都慢熱嘅曼聯，先要留意。