歐國盃決賽周即將上演，賽事從來唔易測，1992年嘅丹麥，臨時戥腳創造神話，令人回味；而且上屆起加到24隊踢，列強要出線16強唔難，球星心態反而難估，等各隊首輪出晒場，會睇準好多。
今屆有11個地方主辦賽事，但呢個賽事以往都唔太利主場捧盃，對上一次主隊攞冠軍已係1984年法國，而今屆4強同決賽都喺英國溫布萊踢，英格蘭加埋分組賽3場主場，當半個主辦國；但「三獅」今屆嗰陣前重後輕，防中位置又唔強，再睇走線形勢，佢哋若取得D組首名，16強會對F組次名，即係好有機會係葡、德同法，呢兩組走線有互動關係，宜小心推敲。法國極強，但上屆以主辦國身份，最終決賽輸俾分組賽第3名出線嘅葡萄牙，隊內團結從來嘅一大問號。C朗已36歲，季尾已走下坡，要領葡軍衛冕更難。荷蘭主帥係法蘭迪保亞加埋迪比係王牌球員，入到16強當交差。未開波，不如先揾分組賽黑馬，土耳其同蘇格蘭，聯賽水準愈低，可能更有驚喜；好似上屆威爾斯同冰島，入到4強又有幾奇。