歐聯淘汰賽16強大戶，係各佔4席嘅「英西兵團」，現時三大奪標熱門都係來自呢兩個國家。不過，今屆英超成利物浦囊中物，西甲又係由戰力跌watt嘅巴塞鬥皇馬嘅宿敵之爭，反而歐聯近年去到淘汰賽乜都可以發生，下半季勢成歐洲球壇焦點。上季16強就已有馬體會、巴黎聖日耳門(PSG)、皇馬同多蒙特陣亡；即係單係計今晚出場4隊，已肯定會有兩隊接連兩屆去到淘汰賽即出局。今晚焦點未必係火力勁弱嘅馬體會點守住衛冕利物浦，反而多蒙特迎戰PSG，似係8場16強賽中，最多波入嘅對戰；兩回合勝方有機會突破「英西兵團」圍剿，打入決賽甚至封王。
多蒙特歇冬後踢咗6場入24球，大賽經驗更豐富嘅PSG踏入2月踢5場入21球，兩隊全攻型唔識守，反利歐聯爭霸；好似上屆紅軍4強先輸3球俾巴塞，都可以返主場反勝4球晉級。今晚呢個match up淨係睇19歲嘅挪威超新星艾寧夏蘭特同法國未來球王、21歲嘅基利安麥巴比鬥入波已夠矚目；美斯同C朗都威咗十幾年，係時候俾後生仔揸莊。