烏雲蔽藍月

英超剩5輪，爭歐聯席位同降班形勢，未算明朗，各隊喺炎夏不斷要一周雙賽，比以往更加大出新人嘅力度；始終疫情下，球會寧重用自家新人慳錢，佢哋肯續約嘅機會亦大增，只見阿仙奴嘅布卡約沙卡，同利物浦嘅居迪斯鍾斯兩位土炮，一續約即刻取得個人英超第一球。紅軍喺高洛普上任後，最成功係俾機會任何人，又試過成隊青年軍踢英聯盃；阿迪達搞咗兵工廠半年，終於頂唔順超高薪嘅奧斯爾，出新人更肯全場壓迫對手，阿仙奴突然起飛，跟防線壓力大減有關。反而阿迪達嘅舊上司哥迪奧拿呢排會幾頭痛，聯賽衛冕失敗嘅曼城，先係等緊上訴結果，隨時冇得玩下屆歐聯；跟住要準備英足盃4強鬥阿仙奴，同埋下月歐聯復賽撼皇馬，博盃賽三冠王。向來唔鍾意用新人嘅哥帥，都要留返啲精兵爭盃，季尾嘅英超「藍月」焗住hea踢；但新人除菲爾科頓上到位之外，其他機會一向唔多未接到班，最致命係阿古路長休，骨幹球員之後又會相繼退下，捱得過今季，下季大執前景都唔樂觀。