今晚英超有場補賽，由修咸頓主場對曼聯。修咸頓上仗作客2比1擊敗米杜士堡，總算終止連續5場不勝劣勢，暫列聯賽榜第九位，冇嘢好爭又唔會降班。佢哋今季主場成績明顯不及去季，至今贏過6場，勝出率得35%，養傷多時嘅射手查理柯士甸上仗終於後備入替復出，預料今場有更多上陣時間。紅魔上仗作客1比2不敵熱刺後，已肯定無法躋身前四，唯有寄望喺歐霸盃決賽擊敗阿積士以取得歐聯入場券。佢哋今季作客成績反而好過主場，至今贏過10場，喺英超作客成績排第四。紅魔早前受傷兵問題困擾，近排情況有好轉，預料今仗可派出較佳陣容應戰。對賽方面，紅魔近6次到訪修咸頓錄得5勝1和佔盡上風，但紅魔焦點已放喺歐霸盃決賽，今仗對兩隊嚟講都係例行公事，大有機會和波收場。