「藍月」曼城搗破「狐穴」，坐穩英超二哥位，可安心全力備戰歐聯同埋英聯盃決賽。雖然翻查過去5季歐聯16強賽，英西共5次對碰，西甲兵佔盡上風，4次踢走對手，單係巴塞隆拿已佔3次；但藍月聽晚深夜出征鬥今非昔比嘅皇家馬德里，唔算難踢，如果禁賽兩季真係成事實嘅話，今季博「標尾會」戰意更濃。藍月隊波下半季陣容完整性明顯強得多，尤其防線齊人，如果一早拎住呢手牌，應該唔會喺聯賽俾利物浦甩開咁多，估計季尾會強力反彈唔俾紅軍搶晒風頭，前線近期最弗嘅「耶穌仔」加比爾捷西斯會係當中關鍵。
早前網上瘋傳佢狠撇巴西名模女友，話要專注足球事業，姑勿論係咪笑料一樁，未夠23歲嘅耶穌仔除土炮菲爾科頓外，係隊內中前場最後生嘅主力。佢呢幾年活喺南美大哥輩阿古路陰影之下，但對方走緊下坡，如果耶穌仔仲唔把握機會「升呢」，疏爽慣嘅藍月必再覓前線猛將，咁佢再磨多一、兩季做二線兵，就真係可以等返巴西慢慢玩咯。