歐洲兩大盃賽分組賽展開，強如上季歐聯冠、亞軍嘅英超利物浦同熱刺，喺分組賽都要戰至最後一輪才出線，最終成就歐聯決賽內訌。今季英超除Big Six以外，上季第七嘅狼隊亦圓夢殺入歐霸分組賽，佢哋喺2013至14年度球季只係英甲冠軍，近年呢間英格蘭中部球會真係火速冒起。有野心唔係壞事，狼隊上季大肆擴軍打出佳績，並有強隊殺手美譽；但升班馬翌季通常露底，加埋歐霸賽事今季已踢了11場，換嚟嘅代價係聯賽開季5戰不勝兼剛被車路士大炒。前鋒殺手墨西哥嘅魯爾占美尼斯連埋國際賽，近10場波有9場踢正選，雖然領隊紐奴喺聯賽已不斷輪換，暫時係除車路士外，正選陣容變得最多嘅英超球隊，但有啲骨幹成員恐怕今季要「大小通踢」。
狼隊喺歐霸分組賽對手出奇弱——布拉加、比錫達斯同施洛雲，不免見獵心喜；但睇番兩季前非Big Six嘅愛華頓，喺歐霸分組賽出局之餘，全季踢完歐霸賽事後嘅翌仗聯賽，只錄得1勝2和5負，班底唔夠厚嘅「貪狼」，小心一路護級一路爭「霸」。