Ad Block Ad Block
體育
2019-08-20 05:15:00

車仔爭霸no stake

分享:

英超下輪就出現同樣兩連勝嘅利物浦同阿仙奴對撼,英超前列之爭斷層漸大,發展落去應冇Big Six咁多隊爭,季初陣容少變為佳。利物浦以歐聯冠軍班底應付季初波,僅門將一人為新兵,夾慣嘅前線三叉戟威力依然;阿仙奴新防線唔穩,下場以攻代守,係唯一嘅逃生門。講開新陣容,傳統6強之中唯一換帥嘅車仔,開季連歐超盃3戰不勝,頭兩場可歸咎失運或形勢使然,但係剛於主場鬥李城被逼和,明顯露底,有排執。
 

喺轉會窗被禁買人,又走咗當家球星「夏神」,陣容變化之大係列強之最,重用從英冠打比郡回收嘅美臣蒙特打攻中,係大膽嘅決定,但佢今場表現唔及對方嘅英格蘭U21隊友占士麥迪臣搶鏡。只見車仔開波踢了幾分鐘好波,下半場已被客軍打開兩截,唔輸偷笑;單箭頭基奧特已老、譚美阿巴謙太嫩,後防走埋大衛雷斯,葛特蘇馬屬計時炸彈,場中無精神領袖。季初脫腳,嚟緊兩場對鬥心十足嘅升班馬諾域治同錫菲聯,再失分恐怕爭霸已no stake。

請接受以下私隱政策及免責聲明,以示你同意am730內之私隱政策及免責聲明。了解更多
接受