英國疫情再爆，但球場內賽事火速推進，單係英聯盃，約1個月要打足4回，決出8強先留返12月再鍊過；乙組仔奧連特上輪因球員勁中新冠肺炎被迫出局，冇心踢嘅熱刺不戰晉級，咁樣恰弱隊以往好少有，加埋低級球會冇觀眾入場收入已大減，小心爆煲再火燒連環船。呢個盃仔今季進一步降格，冠軍唔再攞到下屆歐霸外圍賽入場券，而係跌落新設歐洲第三個盃(暫叫歐霸乙賽事)嘅附加賽，同啲更「流」嘅歐洲小球會較量；不過英超列強志在聯賽前四踢歐聯，呢啲盃仔輸贏好閒。
不過對車仔主帥林柏特嚟講，未必唔志在，事關佢哋上圈大炒班士利，出齊堤亞高施華、夏維斯同芝維爾呢班貴價新兵；以為成功考驗，林柏大膽到俾堤亞高施華呢位36歲巴西名將喺英超做埋隊長擔正，結果鬥西布朗攞返1分執身彩，賽後仲點名逐個守將鬧，今季壓力之大可見。好在車仔今晚英聯盃16強對手熱刺，目標放喺禮拜四場歐霸盃度，車仔出星級陣容如果唔贏，小心到老闆阿巴發火。