睇英國波，尤其以前冰天雪地，普遍球員技術又唔叻；咪一味吊高空波入禁區，俾啲高大前鋒衝門，好睇又好食。時代唔同，冇人再話要一位高大嘅箭頭企喺禁區，先可以得天下。法國首席箭頭基奧特，坐車仔冷板多過踢、紐卡素大隻佬安祖卡路爾受到嘅冷待，更令深愛傳統英式足球嘅人不勝欷歔。
啱啱32歲、6呎4吋高嘅卡路爾，早年硬衝硬頂弄得滿身傷痕，輾轉回到母會紐卡素，去年夏天續多一年約；但條件係周薪基本得2萬鎊，出到場踢後備同正選另計，擺明怕佢傷蝕大本。好在紐卡素教頭係布魯士，過氣英國教頭配過氣中鋒，卡路爾仲有碇企；上仗聯賽後備出場靠佢靚射破蛋，之後英足盃擔正踢到加時先換走，表現全場最佳，攻門多回防勤力，仲有兩次黃金機會唔入，但一換走，紐卡素即輸波。布魯士如果識用佢，今晚場英超護級大戰衝散錫菲聯防線，再俾射手哥林威爾遜攻門；呢種4-4-2打法尤其喺寒冬下，其實先係護級隊生存之道，但睇怕布魯士扮前衛，唔會再彈舊調。