阿仙奴作客1比3不敵西布朗一仗，唔少廠迷帶埋橫額要求領隊雲加落台，其實呢個情況，唔係今季先發生。早於費格遜帶領曼聯時期，已有唔少廠迷認為雲加領軍方法古板冇驚喜，好難同紅魔鬥而要求佢離開，可惜費爵爺退咗休幾年，雲加都仲未走人。最令廠迷憤怒嘅，係歐聯16強主客都輸1比5，兩回合計以2比10慘敗於拜仁腳下，連續7屆16強止步，網上有一位激進廠迷，爆粗鬧雲加鬧得非常有節奏，成為網上點擊率好高嘅一段片。早前會方向雲加開出一份兩年新約，但雲加仍未落實去留，若果今季未能躋身前四痛失來季歐聯席位，在備受壓力下，雲加會否最終肯離隊？相信好多廠迷都想知道答案。