今晚意甲有場獨腳戲，由佩斯卡拉主場迎戰巴勒莫。佩斯卡拉今季升上意甲明顯唔夠班，36戰只曾兩勝，成為包尾大幡兼降班，亦無可厚非。佢哋防守力真係超差，至今失咗79球，平均每場失2.19球，係意甲失球最多球隊。雖則巴勒莫近況有好轉，聯賽連續3場不敗，取得2勝1和，係球隊全季最好走勢，可惜早段失分太多，難逃降班厄運。同佩斯卡拉一樣，佢哋攻守皆弱，平均每場入0.86球，失2.05球，可謂前面入埋都唔夠後面輸。對賽方面，兩隊近6次交手，巴勒莫錄得3勝2和1負略為佔優。事實上，兩隊已篤定降班，今仗都係純粹為面子而戰，論近態及往績巴勒莫略勝一籌，預料可小勝對手。