擁有明星級陣容嘅曼聯，喺李城主場被痛宰，睇嚟攞住球王C朗呢張王牌都係嘥料；未來5場包括明晚歐聯鬥奇兵阿特蘭大，遇上魔鬼賽程，形勢更凶險，蘇斯克查頭痕咯。望低一格，有曼聯名宿朗尼做領隊嘅英冠「公羊」打比郡，今夏唔准俾轉會費買人，再扣12分，手執一班老弱殘兵，反而踢出戰意。貴為曼聯殿堂級射手，總覺得朗尼場上天分多於自身努力，但佢上年唔覺意跳咗上負債重嘅「公羊」呢隻「賊船」，第一次做領隊，都係諗住有得博升英超；唔會估到隊波後防係由39歲嘅前英超好手菲爾積基卡頂住，中場有曼聯出身、但愈撈越愈嘅拉夫摩利臣派牌，前面係過氣老兵森巴鐸克同卡森李察士。不過朗尼做領隊嘅鬥心似乎比踢波更強，隊波今季英冠不敗率暫有七成半，同英超曼聯一樣，最慘係冇個識入波；但戰意超強，場場都當魔鬼賽程嚟踢，今晚鬥入得失得嘅盧頓，膽正命平必搏3分，或者有一日等到白武士入主打救。只係諗，朗尼嘅「魔」性，可能比蘇斯克查更啱做波士。
日報