現代足球，4-2-3-1陣式成大潮流，攻守轉換更靈活，但要稱霸球壇，始終隊內係要坐擁大量多功能球員。射手要有兩大球王美斯左腳加C朗右腳結合，後防又要識踢中堅同翼衛；中場組合6號、8號同10號位嘅分工越唔清晰，對手更難防，爭霸至係王道。
周日英超雙紅會中，阿仙奴嘅迪格蘭賴斯(阿飯)成為全場最佳，賣嘅就係本身打6號位，全場跑咗超過10公里，足跡遍全場；連同今場疊瓦沉底傳中交出助攻，暫時以5次榮登英超助攻王榜首。回防解圍救駕、中場發辦、後上攻門同客串做翼衛，繼續「飯」瓣掂。有佢喺陣中，最能釋放主打10號嘅「奧隊」喺前場無後顧不斷壓迫對手，佢之前公開講過，阿仙奴6、8同10號位係冇特定人選，幾位隊友都踢得，呢個正係阿仙奴最煞食嘅武器。阿飯用超強體力第11年出戰英超，27歲似愈跑愈勁，又係隊內新星杜文仔嘅導師(mentor)，場外出名嘅重情顧家好男人，難怪傳出年底前傾掂續約，相信點都唔會少過單踢右翼嘅沙卡，新嗰份30萬英鎊周薪人工啩？
