哥迪奧拿露出小肚腩

以傳統Big Six上屆聯賽排名計，係翻天覆地嘅一季；導致利記不入今屆歐聯、熱刺同車路士不入歐洲賽，再適逢沙特刮起搶人風暴，不過，對英超影響皮毛，相反去蕪存菁、騰出資金添當打新兵。連同上位中嘅紐卡素、白禮頓同阿士東維拉，今屆英超可能「九雄」混戰。只要看到哥帥喺社區盾提早收起「神鋒夏神」，同佢少有著白裇衫凸出發福小肚腩；就知道佢心態仲可能喺暑假，遙遙長路，睇定嚟踢，當益吓徒弟阿迪達捧個盾開心下，未fit嘅佢同藍月，季初未必無敵。

近6屆英超首輪10戰，傳統Big Six起碼有一死(輸波)；今屆季初最想睇車仔，粗略放走10位主將，入返大部份冇英超經驗嘅年輕新星。車仔大亂章但季前戰績唔錯，後防實力仲可保持，但未開波即傷法國新星尼干古，攻擊組合最受考驗。新帥普捷天奴冇得慢熱，接手首戰英超即要硬撼今屆可能又係曼城爭標最強老對手利記。季初唔對路，車仔嘅狂人美國班主又會走入更衣室！