Ad Block Ad Block
體育
2021-09-07 04:30:00
日報

C朗ready

分享:

世盃外表面睇嘅亂局,局內人未必咁諗。貴為應屆歐國盃冠軍嘅意大利,同上屆世盃盟主法國各自連和失分,霸氣全無;法、意本月「尾輪」分別係今晚對芬蘭、同聽晚對立陶宛,主場又齊腳,戰況未必一面倒,大賽球隊始終都係留返大賽先重視。睇返近屆足球大賽嘅外圍賽,最唔揸流灘嘅歐洲隊係總與冠軍無緣嘅比利時同英格蘭,入球如麻鬥弱旅唔手軟。比利時淨係「魔獸」盧卡古,近8場國際賽入咗8球,年紀唔細但出勤率高、壯碩如牛,仲值成億鎊轉會費回巢車仔,係有原因。哈利卡尼身處嘅「三獅」前線好手更多,哈利仔間中有得唞下,但佢近6場國際賽都入咗6球。英格蘭啱啱出成隊副選輕取安道爾,明晚喺榜首大戰作客有「球王羅拔」嘅波蘭,必夫添博贏埋呢場安心出線。
 

當一班英超球星仲為太公波飛嚟飛去,回歸英超嘅真球王36歲C朗已經完成任務,喺曼市豪宅曬緊太陽弄兒為樂,等明天返曼聯開操,準備9.11出戰紐卡素,「超級英超」即將啟動,先係球迷超級期待。

請接受以下私隱政策及免責聲明,以示你同意am730內之私隱政策及免責聲明。了解更多
接受