喺網上見到一段情侶嘅短訊幾正，男嘅問女友，鍾唔鍾意巴黎？女友即刻心心眼；再問，咁巴塞隆拿呢？女友都話正，正當以為男友咁sweet同佢講去邊度旅行之際，男友就話今晚有歐聯16強首回合，由巴黎聖日耳門主場對巴塞，唔知佢最後有冇命睇到呢場波呢？哈哈！如果睇唔到就真係可惜，巴塞爆大冷狂吞4隻光蛋呀陰公，後防出晒事呀！牛一嘅迪馬利亞真係PSG嘅「天使」，梅開二度助球隊大勝，而另一壽星仔卡雲尼就埋個靚齋，相信佢哋都好滿意呢份生日禮物啦！今場波，連「MSN」攻擊組合都冇符！兩隊5季內第3次喺歐聯淘汰階段窄路相逢，PSG上兩次都出局，今次真係爭氣，晉級形勢大好啦！