5大聯賽中，今屆意、西及法甲嘅冠軍應該大定；相反嚟緊下月喺歐聯8強對撼嘅曼城同拜仁，暫失落聯賽榜首又要齊衝三冠王。究竟邊隊係強中強，嚟緊開鑼嘅「歐國外」，可能係重要啟示。
曼城如果要攞三冠王，季尾2個月要踢多18場，所以哥帥對上兩場都勒住「魔人布歐」夏蘭特呢隻大勇馬。至於英超榜首阿仙奴嘅新星翼鋒布卡約沙卡，今屆28場英超全部「首發」，剛成為英超今屆「雙雙」(入球及助攻雙位數)第一人，廠迷擔心佢burnout，佢話要鍊到盡等暑假先閂埋房門瞓餐飽，主帥阿迪達叫麾下一班國腳好好照顧自己。呢兩大超新星又係所屬國家隊挪威同英格蘭嘅攻擊重心，挪威踢唔到去年尾世盃，歐國外一出場先鬥西班牙，你話「布歐」同阿仙奴隊長奧迪加特會唔會搏到盡？英格蘭先鬥意大利再鬥烏克蘭，曼城係「三獅」大戶，有5人入選，歐國外唔係一般太公波，球會波士呢個假期唔會好瞓。相反德國貴為2024歐國盃主辦國，呢個檔期只喺主場踢兩場友賽，拜仁係大戶4將入選，比賽壓力細得多，大利球會季尾有足夠精兵全方位爭霸。
