不一樣嘅世盃賽期，場場硬仗嘅同級對戰歐國聯，再預示未來40多天嘅「瘋狂」聯賽賽期；令今屆歐洲列強喺卡塔爾爭霸正響起重大警號，相反南美雙雄巴西同阿根廷，以戰養戰，好手又多，歐洲代表要喺世盃5連霸，難度可能係近屆最大。
南美代表喺對上4屆只有阿根廷攞過2014年亞軍，其餘7個決賽席位俾歐洲隊壟斷；但從今屆歐國聯A組賽果係咁爆冷，睇到列強嘅困局唔似係hea打假輸咁簡單。再睇返主流聯賽，部分班霸好似德甲拜仁、意甲亂局同英超車仔、利記同曼聯暫唔似預期，嚟緊大家都要場場去盡追成績，何況點樣保障一班球星健健康康去到卡塔爾，唔係球會波士嘅責任。相反，巴西同阿根廷兩大南美兵團一直試陣玩國際賽，喺法甲PSG合作行雲流水、季初狀態早來嘅尼馬同美斯，面對法甲或歐聯分組賽，唔使出十成功力；而且南美聯賽慣年尾歇冬收爐，對應今屆世盃賽期同心理狀態，相對佔優。再睇，37歲嘅C朗，為太公波又好，為搶紅魔正選一席又好，繼續去盡啦。
