等睇紐卡素入貨

今屆英超傳統Big Six闊別兩季再度歸位，但單睇紅魔以58分錄得該隊英超史上最低分，仲攞到第6名踢歐霸，其他四強同「紅藍」距離拉遠；預期極富有、又唔使踢歐洲賽嘅紐卡素，好有機會來屆上位。上位先要補強，先留意上屆兩支英超球隊嘅買人策略，都係專注自己跑線。如學阿仙奴季前狂簽小將棄大牌，換咗個第5名返嚟；曼聯下屆由荷蘭人「坦克」執教，可能跟呢個方向走，希望新星查頓辛祖成才，再喺荷甲搵新血，但變化太大，只宜觀望。再睇紐卡素冬窗玩即食變身，成效之好遠超外界期望，識簽里昂嘅巴西中場好手般奴古馬雷斯，球探有料到；又喺競爭對手簽入基斯活特、丹般恩同馬特泰基特，呢招更絕，入貨價又唔貴。佢哋油元不缺，今夏英超市場上有幾件好貨色啱用，般尼鋼門尼高普比、李城比利時中場發電機泰利文斯同埋韋斯咸星級工兵迪格蘭賴斯；曼城搵到夏蘭特、PSG留到麥巴比，紐卡素簽到歐洲頂級射手加入「紅藍」之爭，指日可待，今夏擴軍亦令人期待。