搖滾叛徒 ?

這陣子幾隊本地Band界中流砥柱，都不約而同搞Live Show演唱會，包括剛圓滿結束的KOLOR，接下來還有Supper Moment和ToNick；但近年Supper Moment被冠上「搖滾叛徒」一詞，究竟真係咎由自取？定純粹只要牽涉「人仔」就要為反而反？

先小人後君子，Supper Moment以自嘲形式拍攝的短片，本應是唱片公司為宣傳月尾《Supper Moment一直相信演唱會》，順手回應Social Media或連登過去兩年的指控，奈何Present手法實在太肉酸，先不論四人的嬉皮笑臉是否明智，但主音Sunny在片中一句：「講到我哋似乎連搖滾都背叛埋，咁真係冇人夠我哋搖滾啦！」如同一句度了數晚的「完美」台詞，此話一出當然即時在各Social Media、網媒等辣㷫多個火頭，我亦不禁冷笑了一聲。 

Flashback世界各地的經典「搖滾」樂隊，老老實實Rock真係一定要反叛／反制度？相信不少「Rock友」都覺得態度大於一切，反宗教的Marilyn Manson固然有態度，但「無法可修飾的一對手」以及「You may say I’m a dreamer, But I’m not the only one」亦是另一種值得尊敬的態度，甚至更有人說過吃早餐是一件很Rock的事情。所以，「搖滾叛徒」從來都不是批評Supper Moment背叛了搖滾，而是態度問題，當初香港年輕一輩(包括我)都一齊舉起代表《無盡》的手勢，但社會運動發生時卻保持緘默，事後更用「埋頭造歌」為理由敷衍了事，當然是0分重作啦！

至於搵唔搵人仔／上唔上「大台」表演？個人而言並不反對，同為創作人，當然明白創作樣樣都講錢，甚至在看畢《波希米亞狂想曲》後，亦深切明白連傳奇的Queen也要靠商業性巡迴賺人氣賺錄音經費。不過，最緊要就是堅持「奶還奶，切忌奶得肉酸」的態度，而Supper Moment，明顯就是奶得肉酸的活生生例子！