建築其一目的，係改善人嘅生活模式，不論環境、交通、衛生，甚至係空間同時間嘅使用。一個住宅單位，正好代表一個家，可以將外間壓力和煩惱拋下……
勵德邨為香港唯一圓筒形之公共屋邨。
家係身心休息嘅地方，不用追求奢華。同樣親情之建立，非只著眼物質而係在於相處之時間。工作已經追求金碧輝煌，放工又何須置身水晶大堂。普通市民所需要嘅正係安居樂業，而非左鄰右里嘅陌生同虛假。
擇善而執，簡之設計
如要認識香港公共房屋嘅發展，勵德邨一定排於最前。8組合成嘅3座大廈，以「勵潔樓」、「德全樓」同「邨榮樓」組成。由落成嘅1975至76年至今，已經有四十幾年歷史，由當時1963至69年間嘅工務司鄔勵德(Michael Wright)作為命名，正因為勵德邨正好代表同象徵佢嘅設計理念，仲有傳奇嘅「鄔勵德原則」。
六、七十年代嘅香港，並不富裕，加上大量湧入嘅外來移民，唔係住私樓就係住木屋區，冇幾多人能夠有幸「廉租屋」上樓。由1962年開始嘅「政府廉租屋計劃」(Government Low Cost Housing Scheme)，由工務司署設計同興建，早期大廈為共用廁格同浴室，所以回顧歷史亦發現有不少鹹濕色魔偷窺事件。而鄔勵德則一力及一直主張，每個單位需設有獨立廁所同廚房，這正是其Wright Principle。
清涼而亮，井之設計
又講番勵德邨，其特別嘅地方唔止在於係全香港唯一嘅圓筒形公共屋邨，而其半開放式嘅建築設計，亦影響住同期嘅「井字型」屋邨嘅發展。勵德邨等天井型大廈空氣流通，走廊自然採光。加上單位互相對望，就算小朋友在走廊玩耍，爺爺嫲嫲都能充當保安。
勵德邨亦有如藝術館建築，可以讓人靜下來思考生命價值。透過多角度構圖，提供不少想像空間，而唔係個個閂門拉埋窗簾，做個密不透風的宅男。樹木在旁、天空在前、和風迎面，有助了解自己嘅心靈空間。尤其屋邨豎立於大坑半山，遠眺維港，令人嚮往。不論地點以及設計，足以媲美私樓要求，單位面積雖然細小，但總好過現在的豪宅劏房，住得放鬆而有希望，呢啲才是家庭生活。
開心而活，家之設計
為何香港生活愈見困難，除了工資嘅剝削和刻薄，還有不斷被蠶食之生活休憩空間。食肆凍如殮房、超級市場擠迫如貨倉、永遠沒有位坐嘅地鐵車廂、需要搭車才到達嘅區內公園，市民需要其實好簡單，兩個蛋撻一杯奶茶、雞蛋仔夾餅或新鮮菠蘿包，正是七、八十年代所需要的實用、簡潔、開揚樸素。如果活得開心，焦點就不會放於大廈的井洞，選擇於井底跳樓自殺，或是仰望井口希望嘅晴空，都是鄔勵德對香港嘅責任。萬宜水庫、海底隧道、新市鎮以及地下鐵路、都係佢任內開始構思，如何去改善香港人嘅生活，用心建家。2018年1月26日，鄔勵德於英國倫敦離世，享齡105歲。
