我同好多人一樣，每晚臨瞓前嘅最後一件事同每朝瞓醒後嘅第一件事，就係喺張床度碌電話。
每次碌電話，一上Instagram都會見到好多美輪美奐嘅人同物，特別係俊男美女；化行妝著高叉泳衣喺海灘玩水嘅靚女、教人將成支粉底倒落面，捽暈佢，係白蒙蒙嘅臉上面畫到好似做大戲咁嘅陰影，再點到個鼻頭反晒光嘅靚女、聲稱I woke up like this。啱啱瞓醒但有著完美大波浪頭髮嘅靚女、拎住名牌手袋坐跑車，我養貓佢養豹嘅靚女、好著重做gym同healthy life style，靠蛋白飲品維生，身上有著深深嘅人魚線……各式各樣，完美到令你覺得自己一文不值嘅俊男美女。
經常收到讀者inbox，甚至身邊嘅人同我講話覺得自己肥、醜、矮、窮，五官唔夠精緻，話覺得自己係零。我撳開佢哋啲相嚟睇，平心而論明明就好可愛好靚，要陽光有陽光、要靦腆有靦腆。窮就可能睇唔出嘅，但如果只睇外表真係一啲問題都冇喎。
雖然話人對自身嘅不安全感係與生俱來，但唔好忘記人會比較都係一種天性。試想想每日咁樣碌個電話法，咁樣俾啲超現實人偶洗腦法，有咩可能會唔將自己比下去啫？
包括我自己，我相信每人對自己都會有著唔同程度嘅不安全感。其實我而家每朝起身，碌完一輪Instagram睇完大量嘅完美人形，起身去廁所刷牙洗面嗰刻，我都會比鏡入面嘅自己嚇親㗎。不過洗個面定一定驚之後睇真啲，自己雖然係唔完美，但其實都唔係咁差啫，起碼我有嘅係真實。
向世界展示自己最美好一面係人之常情，容易被靚嘅事物吸引都係人嘅天性。但睇還睇唔好上腦，唔好將自己同呢啲近乎虛擬嘅人物比較啦，唔好對自己咁嚴格啦，唔好俾呢類異常審美觀扭曲你嘅價值觀。對鏡笑一笑，睇真啲，其實你好可愛㗎！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter