又到晏晝兩三點呢啲眼瞓時段，來杯咖啡配件包提提神就最適合不過喇。而今日正好想同大家分享一個瑞典語：Fika。
唔知大家有冇聽過Fika呢個概念呢？有留意開北歐文化嘅朋友都應該有聽過。Fika字面上有「飲杯咖啡、食個包唞下」 嘅意思。可以係動詞，可以係名詞，更加係一種生活態度。
喺瑞典，Fika係人權，咖啡係生活嘅必需品。唔知係咪北歐天氣凍，以至人對咖啡嘅需求相對提高呢？瑞典每位成人平約每日會飲成3.2杯咖啡，僅次於鄰國芬蘭，每人每日平均3.5杯，而同樣處於北歐嘅丹麥同挪威就每人每日平均飲3.1杯。瑞典甚至有法例保障每位僱員每日至少享有兩次15分鐘受薪Fika嘅權利，一次朝早、一次午後。而幾乎所有瑞典辦公室都會免費提供咖啡同茶(Fika唔一定要飲咖啡，飲茶都得)，好嘅話仲會提供埋餅乾小點同生果等等俾員工㖭。
有趣嘅係，我發現瑞典人嘅Fika同我哋香港人嘅飲茶有點異曲同工之妙。一，兩者皆難以完全直譯成其他語言。二，香港人成日將「得閒飲茶」掛喺嘴邊，其實瑞典人同樣會經常表達「得閒Fika」，同樣之後又會冇咗件事。三，飲茶雖然叫飲茶，但飲茶從來唔係只關於杯茶，亦唔只關於啲點心，而係同三五知己一齊去茶樓坐低，食個點心、傾下偈呢種感覺。同樣，雖然唔少瑞典人對咖啡成癮係事實，但醉翁之意不在酒，Fika所追求嘅，更加係一種「忙裡偷閒，善待自己，得閒聚聚」嘅生活態度罷了。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter