來電顯示3字頭，不想接，一聽，果然又係推銷。
不過今次改頭換面，收費電視盒子升級。「先生，通知番你，係自動升級，唔使師傅上門，你第二朝重新開機，就會新增咗足球、賽馬、好多好多條頻道。」咁筍？「嗱，依家同你核對客戶資料先……」且慢！即係要加錢？「ErEr，每月俾多少少啫。」唔問幾乎想唔講(或者博臨尾一輪嘴唔多覺)，分一分神都中招。
另一次，電訊公司打來，說我一向登記了某IDD計劃(其實誰記得)，現在計劃變得更着數，每月若干錢就百幾分鐘打任何地區云云──即係我要續約？「唔算續約，只係介紹返……」咁我原本的plan是怎樣的？「唔抵囉，逐次計。」朋友，WhatsApp年代，長途電話用途已經有限，後備來應付不時之需而已，逐次計才合乎經濟原則，變成套餐收費，等如固定一筆開支了，心水稍清者就明白，但在推銷員故意含糊其辭下，很容易被誤導。
這門生意究竟怎做？建立在顧客疏忽大意上？我們想買一件衫、一本書，會去商場或網購，為何電訊業習慣靠cold call？有需要顧客自然往門市部或主動聯絡嘛，好東西不應該咁賣。
高層不會教如此sell，可惜捽數壓力，前線難免走捷徑。換來代價像貓捉老鼠，互不信任，我每逢收到3字頭電話便皺眉。
個別寬頻公司提供減免，抵讚；但整體抵鬧。