滑梯呢家嘢由細到大都鍾意瀡，但大個咗之後，再鍾意瀡，都已經唔敢喺香港任何一個公園嘅滑梯瀡，費事俾人見到你牛高馬大同細路爭瀡滑梯，到時八卦雜誌大字標題話王貽興腦囟未生埋打尖蝦細路搶瀡滑梯就無謂啦………
不過日本嘅滑梯真係正，正在就算係俾細路瀡嘅短滑梯都好，都滑過滑石，有次我童心未泯忍唔住爬咗上去滑，明明都只係一層樓咁高，但一瀡竟然成個人飛離咗軟墊區，爭啲手手腳腳叉晒入公園入口啲欄杆咁滯，仲磨到屁股開晒花，果次之後就再唔敢對滑梯掉以輕心，吖明明香港啲滑梯又辣屁股又唔好瀡，啜到喊，點解外國除咗月亮特別圓，原來連滑梯都特別跣過人………
我點都冇諗到，呢次為咗港鐵去倫敦拍呢個旅遊特輯，竟然要我喺Stratford呢度瀡呢個ArcelorMittal Orbit，呢個滑梯塔有成一百七十幾米高，仲高過自由神像，喺高空套住個布袋瀡落嚟都只係四十秒唔洗，哇我心諗，跳樓咁恐怖，人生所有回憶好似走馬燈咁playback一次都只係幾秒鐘嘅事，喂四十秒都真係煎熬嚟個喎，最慘係當你已經做好晒生理同埋心理準備，諗住死就死啦一鼓作氣瞇埋眼就樁落去，引刀成一快，點知去到入口，先知原來今日已經滿晒額full booking，想玩都冇得玩，要聽朝再嚟多次，即係今晚又要驚多一晚，仲要重複多次忐忑不安痛苦煎熬先可以得到解脫………
人生最慘係咩？最慘係你已經做好準備ready受刑，點知坐上電椅先嚟話冇電，要你聽日再坐上嚟死多次，想俾自己一個痛快都唔得………最終我有冇成功到？當中又有咩驚險搞笑嘢？哈哈喺度梗係唔話你知，想睇嘅就記得到時留意電視台播出嘅《才子Guide人鐵路遊》啦！有我同黃心美一齊主持㗎！