Ad Block Ad Block
新聞
2020-10-20 04:30:00
日報

瑞典人的暗黑糖果實驗

分享:

今日同大家介紹一個關於糖果嘅瑞典風俗—周六糖果日(瑞典語:Lördagsgodis)。

Lördags喺瑞典語入面解作「星期六的」,而Godis就即係糖果咁解。嗯,星期六嘅糖果?雖然聽落好似好開心,Lördagsgodis嘅背後其實卻隱藏住一個極具爭議性嘅實驗—Vipeholmsexperimenten。


1940年代嘅瑞典,由於人民嘅牙齒健康問題嚴重。瑞典政府就委託咗一啲醫療機構,針對人嘅牙齒進行研究,並嘗試搵出蛀牙嘅成因。當時其中嘅醫療機構就搵咗一間名叫Vipeholmn嘅精神病院,並對院入面約650名病人進行唔同嘅實驗。其中一項實驗關於食糖對牙齒嘅影響;實驗對象分為兩組,單位向一組嘅對象頻密咁餵食小量糖果,向另一組嘅對象間斷式咁餵食大量糖果,再觀察呢兩樣行為對人嘅身體分別造成咩影響。由於當年嘅糖果廠商並唔認同食糖係人蛀牙嘅原因,佢哋唔止贊助呢項實驗,仲為呢項實驗發明咗一種特別黐牙同煙韌嘅拖肥糖,將呢種糖命名為Vipeholmstoffee。

呢項咁唔人道嘅實驗由1946年進行到1951年,結果顯示間斷咁食用大量糖果比分次頻密地食用小量糖果對牙齒嘅傷害會比較小,蛀牙嘅風險亦會較少。結果令當時嘅人提倡「只准細路喺星期六食糖」。呢樣風俗流傳至今,就成為咗之後嘅周六糖果日—Lördagsgodis。

時至今日,雖然唔係個個瑞典人都知道呢個咁黑暗嘅實驗,但幾乎大部分人都有周六糖果日嘅概念。下次買糖食之前,不妨睇睇日子,再考慮要唔要儲埋周末一次過大快朵頤喇。

一名乾物女,過氣空姐,為愛由北區移居到北歐多年。熱愛地球同時喜歡講粗口,志願是能夠與動物溝通。

fb:為何斯德哥爾摩沒有譚仔三哥 by 三家姐

ig:sis3ter

請接受以下私隱政策及免責聲明,以示你同意am730內之私隱政策及免責聲明。了解更多
接受