唔少香港朋友都曾經向我表示想試人稱臭魚嘅瑞典鹽醃鯡魚Surströmming，我通常會建議佢哋唔好急住打大佬先，可以先試下另一種「臭名遠播」嘅北歐食物──鹹甘草糖 Saltlakrits，睇下自己頂唔頂得順。
甘草糖愛好者世界各地都有，但對於鹹甘草糖嘅狂熱，就算北歐人敢認第二，相信都冇其他人敢認第一。鹹甘草糖一般都呈黑色，但形狀、大小、質地可以千變萬化。仲記得當年剛嚟到瑞典，一次誤食鹹甘草糖嘅慘痛經歷。鹹甘草糖嘅味道，我會將佢形容為「先喺路面撒鹽，倒入大量八角，然後再用車輾過。」你再去食個車胎，就係咁嘅味。
唔止味道奇特，大量進食甘草糖仲會令血壓上升，同埋引起唔少健康問題，但咁樣並無減瑞典人對甘草糖嘅狂熱。當小龍蝦節同鬆餅節都存在時，當然亦有專屬甘草糖嘅節日。
Tuija Räsänen女士於2009年喺斯德哥爾摩舉辦咗首屆甘草糖節，本來只係個小型嘅愛好者分享活動，豈料反應極佳。首屆已經有超過千三人出席，第二屆出席人數已飆升到四千人，到2018年出席嘅仲去到九千人。如今呢個傳統已經有十一年，規模越做越大。今年嘅甘草糖節本於三月尾舉行，可惜因為疫情關係延期，暫時仲未有新嘅確實日子，一眾嘅甘草糖迷可失望了。
甘草糖雖然味道奇特，甚至會對健康構成影響，但係喜歡佢嘅人就係會繼續喜歡佢。做人都一樣，無論你有「奇怪」，味道有幾刁鑽，就算係又鹹又澀都好，總會搵到個懂得欣賞自己、不離不棄嘅人。